Iqembu laseMzansi, iMamelodi Sundowns, lizowazi kusihlwa amaqembu elizobhekana nawo esigabeni samaqoqo kwiFifa Club World Cup ezodlalwa ngonyaka ozayo njengoba zizoqhathwa eMiami, e-United States, ngo-8 ebusuku.

Lo mqhudelwano ozobe uqala ukudlalwa ngamaqembu angu-32, uzobanjelwa emadolobheni ehlukene e-United States ngonyaka ozayo kusukela ngoJuni 15 kuya kuJulayi 13.

Amaqembu azoqhathwa ngokuhlukana kwamazwekazi aqhamuka kuwona. Afakwe emabhodweni amane anamaqembu ayisishiyagalombili ngalinye.

Ibhodwe lokuqala liqukethe amaqembu amane akleliswe phezulu e-Europe, namane ahamba phambili e-South America. Elesibili linamanye ayisishiyagalombili aqhamuka e-Europe.

Elesithathu linamaqembu amabili aphezulu asuka e-Asia, e-Afrika nasesifundeni seConcacaf, kanye namabili aseSouth America. Elesine lakhiwe ngamaqembu asele ase-Asia, Afrika, nakwiConcacaf, iqembu elimele i-Oceania nelimele izwe elizosingatha leli midlalo, okuyi-Inter Miami.

Uma sekutonyulwa, amaqembu avela ezwenikazi elilodwa ngeke abekwe eqoqweni elilodwa, ngaphandle kwamaqembu ase-Europe. Njengoba i-UEFA imelwe ngamaqembu angu-12 kulo mqhudelwano, kusho ukuthi amaqoqo amane kwayisishiyagalombili azoba namaqembu amabili ase-Europe.

ISundowns isebhodweni lesine, ihambisana ne-Esperance yaseTunisia. Iqembu likaRhulani Mokoena laseMorocco, iWydad, lisebhodweni lesithathu ne-Al Ahly yase-Egypt edlalelwa ngumgadli wakuleli uPercy Tau.

Izolo inhlangano eyengamele ibhola emhlabeni, iFifa, imemezele ukuthi inkampani yokusakaza ezemidlalo kwi-internet i-DAZN iyona ephethe amalungelo okusakaza lo mqhudelwano emhlabeni wonke.

Lesi sivumelwano sisho ukuthi yonke imidlalo engu-63, izosakazwa bukhoma mahhala kwi-DAZN emhlabeni jikelele. Kungenzeka futhi ukuthi le nkampani ivumele iziteshi zokusakaza ezingakhokhelwa ukuthi nazo ziyisakaze bukhoma le midlalo.

Amabhodwe okuzotonyulwa kuwona amaqembu uma eseqhathwa:

Pot 1: Manchester City (England), Real Madrid (Spain), FC Bayern München (Germany), Paris Saint-Germain (France), CR Flamengo (Brazil), SE Palmeiras (Brazil), CA River Plate (Argentina), Fluminense FC (Brazil).

Pot 2: Chelsea FC (England), Borussia Dortmund (Germany), FC Internazionale Milano (Italy), FC Porto (Portugal), Atlético de Madrid (Spain), SL Benfica (Portugal), Juventus FC (Italy), FC Salzburg (Austria).

Pot 3: Al Hilal (Saudi Arabia), Ulsan HD (South Korea), Al Ahly FC (Egypt), Wydad AC (Morocco), CF Monterrey (Mexico), Club León (Mexico), CA Boca Juniors (Argentina), Botafogo (Brazil).

Pot 4: Urawa Red Diamonds (Japan), Al Ain FC (United Arab Emirates), Espérance Sportive de Tunisie (Tunisia), Mamelodi Sundowns FC (South Africa), CF Pachuca (Mexico), Seattle Sounders FC (United states), Auckland City FC (New Zealand), Inter Miami CF (United States).